VIDUSHI VASANTHI BHAT - SHRADDHANJALI

 ಭಾನುವಾರ, 5 ದಶಂಬರ 2021 

ಅಂಬಲಪಾಡಿ, ಉಡುಪಿ.

ಸಂಗೀತ ವಿದೂಷಿ ಶ್ರೀಮತಿ ವಸಂತಿಅಕ್ಕ ನವರು ಅತ್ಯಂತ ಸರಳ ಸಜ್ಜನಿಕೆಯ ವ್ಯಕ್ತಿಯಾಗಿದ್ದರು. ಪಿಟೀಲು ವಾದನದಲ್ಲಿ ವಿದ್ವತನ್ನು ಗಳಿಸಿದ್ದವರು.ಅವರ ಪತಿ ಶ್ರೀ ರಾಮಭಟ್ ಅವರು, ಉಡುಪಿ ಎಂ.ಜಿ.ಎಂ ಕಾಲೇಜಿನ  ಪ್ರಾಂಶುಪಾಲರಾಗಿದ್ದರು.

ಡಾ ಸತೀಶ್ ಪತ್ನಿ ಜ್ಯೋತಿ ಯವರೊಡನೆ ವಸಂತಿ ಅಕ್ಕ 

ಅವರ ಮಗ ಡಾ ಸತೀಶ್ ಅವರು ನೇತ್ರ ತಜ್ಞರು, ನಾನು ದುಬೈಯಲ್ಲಿ ಇರುವಾಗ  ನನ್ನ ಕಣ್ಣಿನ ಪೊರೆಯ ಅಪರೇಷನ್ ಅವರಿಂದ ಆಗಿತ್ತು. ಶ್ರೀಮತಿ ವಸಂತಿ ಅವರು ದುಬೈಗೆ ಮಗನ ಮನೆಗೆ ಬಂದಿದ್ದಾಗ, ನಾವು ವಾಸವಾಗಿದ್ದ ಶಾರ್ಜಾದ ನಮ್ಮ ಮನೆಗೂ  ಬಂದು ಪಿಟಿಲನ್ನು ನುಡಿಸಿ ನಮಗೂ, ನಮ್ಮ ಸ್ನೇಹಿತರಿಗೂ ಸಂತಸ ನೀಡಿದ್ದರು. ಈ ಕೆಳಗಿನ ಚಿತ್ರಗಳಲ್ಲಿ ಕಾಣಬಹುದು.

ಇಂದು ಅವರು ರಾಗಧನ ಬಳಗದವರು ಅಂದಂತೆ "ರಾಗದಲ್ಲಿ ಲೀನವಾದ ನಮ್ಮ ವಿದೂಷಿ ವಸಂತಿ ಅಕ್ಕ"

ನಾದದಲ್ಲಿ ಲೀನರಾದ ವಿದುಷಿ ವಸಂತಿಯಕ್ಕ

ತನ್ನ ಮೆಚ್ಚಿನ ಶಿಷ್ಯ ಪ್ರಮಥ ಭಾಗವತ್ (ಮೃದಂಗ ವಿದ್ವಾನ್ ಬಾಲಚಂದ್ರ ಭಾಗವತರ ಪುತ್ರ) ನಿಗೆ ಈ ದಿನ ಸಂಜೆ ಕಾಂಭೋಜೀ ರಾಗದಲ್ಲಿ ವಯೊಲಿನ್ ನುಡಿಸಾರಿಕೆಯನ್ನು ಹೇಳಿ ಕೊಡುತ್ತಿದ್ದ ವಿದುಷಿ ವಸಂತಿ ರಾಮ ಭಟ್ (ರಾಗಧನದ ಹಿರಿಯ ಸದಸ್ಯೆ, ನಮ್ಮೆಲ್ಲರ ಪ್ರೀತಿಯ ವಸಂತಿಯಕ್ಕ) ತುಸು ಆಯಾಸಗೊಂಡು ಅಲ್ಲೇ ವಿರಮಿಸಿದರಂತೆ.. ಅವರು ಅಸೌಖ್ಯದಲ್ಲಿರುವುದನ್ನು ಗಮನಿಸಿ, ಅವರನ್ನು ಸಮೀಪದ ಹೈಟೆಕ್ ಆಸ್ಪತ್ರೆಗೆ ಕರೆದೊಯ್ಯುವಾಗ ಮಾರ್ಗಮಧ್ಯೆ ಕೊನೆಯುಸಿರೆಳೆದ ವಸಂತಿಯಕ್ಕ, ನಾದಸರಸ್ವತಿಯಲ್ಲಿ ಲೀನವಾದ ವಿಷಯ ಇದೀಗ ತಿಳಿದು ಬಂತು... 

ಮೊನ್ನೆಯಷ್ಟೇ ಎಂಜಿಎಂ ಕಾಲೇಜಿನ ನೂತನ ರವೀಂದ್ರ ಮಂಟಪದಲ್ಲಿ ಜರುಗಿದ ೪೩ನೆಯ ವಾದಿರಾಜ ಕನಕದಾಸ ಸಂಗೀತೋತ್ಸವ - ೨೦೨೧ರ ಶುಕ್ರವಾರ ಸಂಜೆ  ಕುಮಾರಿ ಭಾಮಿನಿ ಭಟ್ ಪುತ್ತೂರು ಇವರಿಗೆ ವಯೋಲಿನ್ ಸಹವಾದನ ನೀಡಿ, ಆಶೀರ್ವದಿಸಿದ್ದರು ವಸಂತಿಯಕ್ಕ... 

ಮಧೂರು ಮಾಧುರ್ಯದ ವತಿಯಿಂದ ವಿದ್ವಾನ್ ಮಧೂರು ಸರ್ ಜತೆಗೂಡಿ ವಿದುಷಿ ವಸಂತಿಯಕ್ಕನವರಿಗೆ ಕಳೆದ ವರ್ಷ ಸನ್ಮಾನ ಮಾಡಿದ್ದೆವು.... ಅವರು ಇಂದು ನಮ್ಮೊಂದಿಗಿಲ್ಲ... 😔. 

ವಸಂತಿಯಕ್ಕನವರ ಆತ್ಮಕ್ಕೆ ಚಿರಶಾಂತಿಯನ್ನು ಕೋರುವ ರಾಗಧನ ಬಳಗ...

82 ವರ್ಷಗಳ ತಮ್ಮ ಸಾರ್ಥಕ ಜೀವನವನ್ನು ನಡೆಸಿ, ಸಾಕಷ್ಟು ವಿಧ್ಯಾರ್ಥಿಗಳಿಗೆ ಸಂಗೀತ, ಪಿಟೀಲು ನಾದವನ್ನು ಹರಸಿ, ಹೃದಯಾಘಾತದಿಂದ, ಏಕಾಏಕಿ, ಯಾರಿಗೂ ತೊಂದರೆ ಕೊಡದೇ  ಇಹ ಲೋಕ ತ್ಯಜಿಸಿರುವುದು ಅವರು ಮಾಡಿದ ಪುಣ್ಯ ಕೆಲಸದಿಂದಾಗಿಯೂ ಇರಬಹುದೇನೋ??

2012 ಸಂಗೀತ ಮಾಲಿಕೆ ಕಾರ್ಯಕ್ರಮದಲ್ಲಿ 

2012 ಮೇ ತಿಂಗಳಲ್ಲಿ ಸಾಲಿಕೇರಿ, ನಮ್ಮ ಬಿರ್ತಿಮನೆಯಲ್ಲಿ ನಡೆದ "ಸಂಗೀತ ಮಾಲಿಕೆ" ಕಾರ್ಯಕ್ರಮದಲ್ಲಿ  ಅವರನ್ನು ಸನ್ಮಾನ ಮಾಡಲಾಗಿತ್ತು. 

ಅವರ ಆತ್ಮಕ್ಕೆ ಚಿರಶಾಂತಿ, ಸದ್ಗತಿಯನ್ನು ಮತ್ತು ಅವರ ಕುಟುಂಬ, ಅಭಿಮಾನಿಗಳಿಗೆ ನೋವನ್ನು ಸಹಿಸುವ ಶಕ್ತಿಯನ್ನು ಭಗವಂತನು ಕರುಣಿಸಲಿ, ಎಂದು ನಮ್ಮೆಲರ ಪ್ರಾರ್ಥನೆ.

ಓಂ ಶಾಂತಿ, ಓಂ ಸದ್ಗತಿ ......

ಬರೆದಿರುವುದು, ಮಂಗಳವಾರ ಡಿಸೆಂಬರ 7, 2021