ಕೈಲಾಸನಾಥ ಪರಮಶಿವ

 ಬೋಲೆನಾಥ್ ಶಿವ 

ಶಿವನನ್ನು ಪೂಜಿಸಲು ಕಾರಣವೇನು ಗೊತ್ತಾ..? ಇಲ್ಲಿದೆ ಕೈಲಾಸನಾಥನ ಸದ್ಗುಣಗಳು

ಹಿಂದೂ ಧರ್ಮದಲ್ಲಿ ಪರಶಿವನಿಗೆ ಅತ್ಯನ್ನತ ಸ್ಥಾನ, ಮಾನವಿದೆ. ಆದರೆ ಶಿವನನ್ನು ಯಾಕೆ ಪೂಜಿಸಲಾಗುತ್ತದೆ ಗೊತ್ತಾ..? ಶಿವನ ಈ ಸದ್ಗುಣಗಳೇ ಆತನನ್ನು ಪೂಜಿಸಲು ಕಾರಣವಾಯ್ತಾ..?

ಶಿವನು ತ್ರಿಮೂರ್ತಿ 

ದೇವರುಗಳಲ್ಲಿ ಒಬ್ಬನಾಗಿದ್ದಾನೆ. ಹಿಂದೂ ಧರ್ಮದ ತ್ರಿಮೂರ್ತಿ ದೇವರುಗಳಾದ ಬ್ರಹ್ಮ, ವಿಷ್ಣು, ಮಹೇಶ್ವರರಲ್ಲಿ ಈತನು ಕೂಡ ಒಬ್ಬನು.ಶಿವನು ಕೈಲಾಸದಲ್ಲಿ ವಾಸವಾಗಿರುವುದರಿಮದ ಈತನು ಕೈಲಾಸದೊಂದಿಗೆ ಅವಿನಾಭಾವ ಸಂಬಂಧವನ್ನು ಹೊಂದಿದ್ದಾನೆ. ದೇವಿ ಪಾರ್ವತಿ ಪರಶಿವನ ಪತ್ನಿಯಾದರೆ, ವಿಘ್ನನಿವಾರಕ ಗಣೇಶ ಮತ್ತು ಕಾರ್ತಿಕೇಯ ಈತನ ಪುತ್ರರಾಗಿದ್ದಾರೆ ಹಾಗೂ ನಂದಿಯು ಪರಶಿವನ ವಾಹನವಾಗಿದೆ. ರುದ್ರ, ಮಹೇಶ್ವರ, ನೀಲಕಂಠ ಸೇರಿದಂತೆ ಇನ್ನು ನಾನಾ ಹೆಸರುಗಳಿಂದ ಈತನನ್ನು ಪೂಜಿಸಲಾಗುತ್ತದೆ. ಹಿಂದೂ ಧರ್ಮದಲ್ಲಿ ಶಿವನನ್ನು ವಿಶೇಷವಾಗಿ ಪೂಜಿಸಲಾಗುತ್ತದೆ. ಹಿಂದೂ ಧರ್ಮದಲ್ಲಿ ಶಿವನನ್ನು ಪೂಜಿಸಲು ಕಾರಣವೇನು ಗೊತ್ತಾ..?

​ಶಿವನನ್ನು ಸುಲಭವಾಗಿ ಸಂತೋಷಪಡಿಸಬಹುದು

🌿ಶಿವನು ಮುಗ್ಧ ಸ್ವಭಾವದವನಾಗಿದ್ದಾನೆ. ಆದ್ದರಿಂದ ಆತನನ್ನು ಭೋಲೇನಾಥ ಎನ್ನುವ ಹೆಸರಿನಿಂದ ಕರೆಯಲಾಗುತ್ತದೆ. ಶಿವನಿಗೆ ಕೋಪ ಹೆಚ್ಚಿದ್ದರೂ ಕೂಡ ಆತನನ್ನು ವಿವಿಧ ಆರಾಧನೆಯ ಮೂಲಕ, ಪ್ರಾರ್ಥನೆಯ ಮೂಲಕ ಬಹಳ ಬೇಗ ಸಂತೋಷಗೊಳಿಸಬಹುದು. ಪರಶಿವನು ಪರಿಶುದ್ಧ ಹೃದಯದವನಾಗಿದ್ದರಿಂದ ಆತನು ಭಕ್ತರು ನಿಷ್ಠೆಯಿಂದ ಯಾವುದೇ ವರವನ್ನು ಬೇಡಿದರೂ ಕೂಡ ನೆರವೇರಿಸುತ್ತಾನೆ. ಯಾವುದೇ ಪಾಪ ಕೃತ್ಯಗಳನ್ನು ಮಾಡಿದ್ದರೂ ಕೂಡ ಭಕ್ತಿಯಿಂದ ನನ್ನನ್ನು ಕ್ಷಮಿಸು ದೇವ ಎಂದು ಶಿವನನ್ನು ಪ್ರಾರ್ಥಿಸಿದರೆ ಸಾಕು ಶಿವನು ಅವರ ಪಾಪ ಕರ್ಮಗಳನ್ನು ದೂರಾಗಿಸುತ್ತಾನೆ. 

​ಶಿವನು ಅಸಂಪ್ರದಾಯಿಕ

ಶಿವನು ತನ್ನದೇ ಆದ ಸ್ವಾತಂತ್ರ್ಯ ಪ್ರಜ್ಞೆಯನ್ನು ಹೊಂದಿದವನು. ಇದು ಕೆಲವೊಮ್ಮೆ ನೈತಿಕ ಮತ್ತು ಸಾಮಾಜಿಕ ಪದ್ಧತಿಗಳನ್ನು ತೊಡೆದುಹಾಕಲು ಕಾರಣವಾಗುತ್ತದೆ. ಶಿವನು ಭಕ್ತರ ಹಿನ್ನೆಲೆ, ಜೀವನ ವಿಧಾನ, ನೀವು ಅನುಸರಿಸುತ್ತಿರುವ ಜೂವನ ಶೈಲಿಯನ್ನು ಹೆಕ್ಕಿಸುವುದಿಲ್ಲ. ಬದಲಾಗಿ ದುಷ್ಟರ ಶಿಕ್ಷಗೆ ಏನು ಮಾಡಬೇಕೋ ಅದನ್ನೇ ಮಾಡುತ್ತಾನೆ. ಆಡಂಬರದ ಪೂಜೆ, ಜೀವನ ಶೈಲಿ ಭಯಸುವವನು ಶಿವನಲ್ಲ. ಆತನು ಎಂದಿಗೂ ಸರಳ ಜೀವನವನ್ನೇ ರೂಢಸಿಕೊಂಡು ಬಂದವನು. ಹಾಗಾಗಿ ಭಕ್ತರು ಎಷ್ಟೇ ಸರಳವಾಗಿ ಆತನನ್ನು ಭಕ್ತಿಯಿಂದ ಪೂಜಿಸಿದರೂ ಆತನು ಸಂತಸಗೊಳ್ಳುತ್ತಾನೆ. 

​ಶಿವನು ದೇಹದ ಅಧಿಪತಿ

ಪರಶಿವನು ವ್ಯಕ್ತಿಯ ದೇಹದ ಪ್ರಮುಖ ಅಂಶವಾದ ತಮಸ್ಸನ್ನು ಸಂಕೇತಿಸುತ್ತಾನೆ. ವ್ಯಕ್ತಿಯ ಜೀವಂತ ದೇಹವು ಆತನ ಆತ್ಮದ ರೂಪದಲ್ಲಿರುತ್ತದೆ. ಹಾಗೂ ವ್ಯಕ್ತಿಗಳ ಅಂತರಾತ್ಮವು ಶಿವನನ್ನು ಪ್ರತಿನಿಧಿಸುತ್ತದೆ. ಅಂದರೆ ಒಂದು ವೇಳೆ ನೀವು ಜೀವನದಲ್ಲಿ ಮೋಕ್ಷವನ್ನು ಪಡೆಯಲು ಇಚ್ಛಿಸಿದರೆ ಮೊದಲು ಶಿವನನ್ನು ಪೂಜಿಸಬೇಕು. ಶಿವನನ್ನು ಪೂಜಿಸಿದರೆ ವ್ಯಕ್ತಿಯ ಆತ್ಮದಲ್ಲಿನ ಕೆಟ್ಟ ಭಾವನೆಗಳು ನಾಶವಾಗುತ್ತದೆ. ನಿಮ್ಮ ಆತ್ಮದಲ್ಲಿನ ಕೆಟ್ಟ ಭಾವನೆಗಳು ನಾಶವಾದಾಗ ಮಾತ್ರ ಮೋಕ್ಷವನ್ನು ಪಡೆಯಲು ಸಾಧ್ಯ. ಆದ್ದರಿಂದ ಶಿವನನ್ನು ಪೂಜಿಸಿ ಮೋಕ್ಷದ ಹಾದಿಯನ್ನು ಪಡೆಯಬಹುದು. 

​ಶಿವನನ್ನು ಪೂಜಿಸುವುದು ಸುಲಭ

ಒಂದು ವೇಳೆ ನೀವು ಶಿವನ ಆಶೀರ್ವಾದವನ್ನು ಪಡೆಯಲು ಶಿವನನ್ನು ಭಕ್ತಿಯಿಂದ ಪೂಜಿಸಲು ಹೊರಟಾಗ ಆತನ ಪೂಜೆಗೆ ಯಾವುದೇ ಬ್ರಾಹ್ಮಣರ ಅಗತ್ಯವಿರುವುದಿಲ್ಲ. ಒಂದು ವೇಳೆ ನಿಮ್ಮ ಹತ್ತಿರದಲ್ಲಿ ಯಾವುದಾದರೂ ಶಿವನ ದೇವಾಲಯದಲ್ಲಿ ಪೂಜಿಸಲು ಅನುಮತಿಯಿದ್ದರೆ, ನೀವು ನೇರವಾಗಿ ಹೋಗಿ ನೀವೇ ಪೂಜೆ ಸಲ್ಲಿಸಬಹುದು. ಯಾಕೆಂದರೆ ಹೆಚ್ಚಿನ ದೇವಾಲಯಗಳಲ್ಲಿ ಬ್ರಾಹ್ಮಣರನ್ನು ಹೊರತುಪಡಿಸಿ ಬೇರಾರಿಗೂ ಪ್ರವೇಶವಿರುವುದಿಲ್ಲ. ಅಥವಾ ಅವನ ನಾಮವನ್ನು ಮನೆಯಲ್ಲೇ ಜಪಿಸಬಹುದು ಅಥವಾ ಆತನಿಗೆ ಯಾವ ವಸ್ತುಗಳನ್ನಾದರೂ ಕೂಡ ಅರ್ಪಿಸಬಹುದಾಗಿದೆ. ನಾವು ಮಾಡುವ ಪ್ರತಿಯೊಂದು ಕಾರ್ಯದಲ್ಲೂ ಶಿವನೊಂದಿಗೆ ನೇರ ಸಂಪರ್ಕವನ್ನು ಹೊಂದಿರುತ್ತೇವೆ ಹಾಗಾಗಿ ಭಕ್ತಿಯಿಂದ ಸರಳವಾಗಿ ಶಿವನನ್ನು ಪೂಜಿಸಿದರೆ ಸಾಕು. 

ಕೋಪವನ್ನು ಬಹುಬೇಗ ನಿಯಂತ್ರಿಸುವನು

ಶಿವನನ್ನು ದೇವರುಗಳಲ್ಲೇ ಅತ್ಯಂತ ಕೋಪಿಷ್ಟ ದೇವರೆಂದು ಪರಿಗಣಿಸಲಾಗಿದೆ. ಶಿವನು ಕೋಪಗೊಂಡಾಗ ವಿನಾಶಕಾರಿ ಶಕ್ತಿಯನ್ನು ಹೊಂದಿರುತ್ತಾನೆ. ಕೋಪದಲ್ಲಿ ಆತ ಎಲ್ಲವನ್ನು ನಾಶಗೊಳಿಸಬಲ್ಲನು. ಆದರೆ ಶಿವನು ಯಾವತ್ತೂ ಕೂಡ ವಿನಃ ಕಾರಣ ತನ್ನ ಕೋಪವನ್ನು ಜಗತ್ತಿಗೆ ತೋರಿಸಿದವನಲ್ಲ. ನಾವು ತಪ್ಪು ಯಾವ ಕಾರಣಕ್ಕಾಗಿ ಮಾಡಿದ್ದೇವೆಂದು ತಿಳಿದು ತದನಂತರ ಆತ ನಮ್ಮ ಮೇಲೆ ಕೋಪಗೊಳ್ಳುತ್ತಾನೆ.

​ಉತ್ತಮ ಪತಿಯಾಗಿ ಪರಶಿವ

ಶಿವನನ್ನು ಅರ್ಧನಾರೀಶ್ವರ ಎಂದು ಕೂಡ ಕರೆಯಲಾಗುತ್ತದೆ. ಈತ ತನ್ನ ದೇಹದ ಅರ್ಧ ಭಾಗವನ್ನು ತನ್ನ ಪತ್ನಿ ಪಾರ್ವತಿಗೆ ನೀಡಿದ್ದಾನೆ. ಇದರರ್ಥ ಪ್ರಕೃತಿಯಲ್ಲಿ ಗಂಡು, ಹೆಣ್ಣು ಇಬ್ಬರೂ ಸಮಾನರು. ಗಂಡೂ ಮೇಲಲ್ಲ, ಹೆಣ್ಣು ಮೇಲಲ್ಲ ಎಂಬರ್ಥವನ್ನು ನೀಡುತ್ತದೆ. ಸಾಂಸಾರಿಕ ವಿಷಯದಲ್ಲಿ ಶಿವನು ಬ್ರಹ್ಮ ಮತ್ತು ವಿಷ್ಣುವಿಗಿಂತಲೂ ಭಿನ್ನನು. ಶಿವ ಯಾವಾಗಲೂ ಕೂಡ ತನ್ನ ಪತ್ನಿಯನ್ನು ಸಮನಾಗಿ ತನ್ನ ಪಕ್ಕದಲ್ಲೇ ಕುಳಿಸಿಕೊಳ್ಳುತ್ತಾನೆ. ಆಕೆಗೂ ಕೂಡ ತನ್ನಷ್ಟೇ ಹಕ್ಕಿದೆ ಎನ್ನುವುದನ್ನು ಬ್ರಹ್ಮಾಂಡಕ್ಕೆ ಸಾರಿದವನೀತ. 

ಕೌಟುಂಬಿಕ ವ್ಯಕ್ತಿಯಾಗಿ ಪರಶಿವ

ಪರಶಿವನ್ನು ಕೇವಲ ತನ್ನ ಪತ್ನಿ ಪಾರ್ವತಿಯನ್ನು ಮಾತ್ರವಲ್ಲ, ಆತ ತನ್ನ ಸಂಪೂರ್ಣ ಕುಟುಂಬವನ್ನೇ ಅತಿ ಹೆಚ್ಚು ಗೌರವ ಹಾಗೂ ಪ್ರೀತಿಯಿಂದ ಕಾಣುತ್ತಾನೆ. ಕೌಟುಂಬಿಕ ಮೌಲ್ಯಗಳನ್ನು, ಪ್ರೀತಿ ಮತ್ತು ಕಾಳಜಿ ತುಂಬಿದ ಕುಟುಂಬದ ಮಹತ್ವವನ್ನೂ ಕೂಡ ಪ್ರಪಂಚಕ್ಕೆ ಸಾರಿದ್ಧಾನೆ. ಬ್ರಹ್ಮಾಂಡದಲ್ಲಿನ ಎಲ್ಲಾ ದೇವಾನು ದೇವತೆಗಳು ಹಾಗೂ ಗ್ರಹಗಳು ಶಿವನೊಂದಿಗೆ ಸಮಯವನ್ನು ಕಳೆಯಲು ಹೆಚ್ಚು ಇಚ್ಛಿಸುತ್ತಾರೆ. 

​ಅತ್ಯಂತ ಶಕ್ತಿಶಾಲಿ ದೇವರು

ಸಮುದ್ರ ಮಂಥನದ ಸಮಯದಲ್ಲಿ ಇತರೆ ದೇವರುಗಳು ವಿಷವನ್ನು ಸೇವಿಸಲು ಹೆದರಿ ಹಿಂಜರಿದಾಗ ಪರಶಿವನು ಬ್ರಹ್ಮಾಂಡವನ್ನೇ ಉಳಿಸಲು ತನ್ನ ಜೀವವನ್ನು ಲೆಕ್ಕಿಸದೇ ಆ ವಿಷವನ್ನು ಕುಡಿದು ಬಿಡುತ್ತಾನೆ. ಭಕ್ತರ ದುಃಖವನ್ನು, ಮಾನವ ಜೀವನದಲ್ಲಿ ವಿಷದಂತಿರುವ ಕಷ್ಟವನ್ನು ಆತನು ನಾಶಮಾಡುವಲ್ಲಿ ಪ್ರಸಿದ್ಧನು. ಅಷ್ಟು ಮಾತ್ರವಲ್ಲ, ಅಜ್ಞಾನವನ್ನು, ಅಹಂಕಾರವನ್ನು ತೊಡೆದು, ಬಾಂಧವ್ಯ, ಆಧ್ಯಾತ್ಮಿಕ ಚಿಂತನೆಯತ್ತ ಸಾಗಲು ಸಹಕರಿಸುತ್ತಾನೆ. 

​ಪ್ರಾಣಿಗಳ ಅಧಿಪತಿ

ಶಿವನು ಕೇವಲ ಮನುಷ್ಯರಿಗೆ ದೇವರು ಮಾತ್ರವಲ್ಲ, ಶಿವನು ಪ್ರಾಣಿಗಳನ್ನೂ ಕೂಡ ಇಷ್ಟಪಡುವ ಗುಣವುಳ್ಳವನು. ಪ್ರಪಂಚದ ಸಕಲ ಜೀವಿಗಳನ್ನು ಕೂಡ ಸಹಾನುಭೂತಿಯಿಂದ ಮತ್ತು ಪ್ರೀತಿಯಿಂದ ರಕ್ಷಿಸುತ್ತಾರೆ. ರೋಗ, ಸಾವು ಮತ್ತು ವಿನಾಶದಿಂದ ಪ್ರಾಣಿಗಳನ್ನು ರಕ್ಷಿಸಬಲ್ಲ ವನಾಗಿರುವುದರಿಂದ ಆತನನ್ನು ಪಶುಪತಿನಾಥನೆಂದು ಕರೆಯಲಾಗುತ್ತದೆ. ಒಂದು ವೇಳೆ ನೀವು ಮುಂದಿನ ಜನ್ಮದಲ್ಲಿ ಉತ್ತಮ ಜೀವನವನ್ನು ನಡೆಸುವ ಬಯಕೆ ಹೊಂದಿದ್ದರೆ ಶಿವನನ್ನು ಆರದಿಸಿರಿ. 

​ಶಿವನು ನಿಮಗೆ ಬುದ್ಧಿವಂತಿಕೆ ಮತ್ತು ಜ್ಞಾನವನ್ನು ನೀಡಬಲ್ಲನು

ಸರಸ್ವತಿ ದೇವಿಯು ಬುದ್ಧಿವಂತಿಕೆ ಮತ್ತು ಜ್ಞಾನಕ್ಕೆ ಹೆಸರುವಾಸಿಯಾಗಿದ್ದರೆ, ಶಿವನು ಸರ್ವ ಶಿಕ್ಷಕ ವಿಶ್ವ ರಕ್ಷಕನಾಗಿದ್ದಾನೆ. ಶಿವನಿಂದಲೇ ಎಲ್ಲಾ ಜ್ಞಾನವು ಗಂಗಾ ರೂಪದಲ್ಲಿ ಹರಿಯುತ್ತದೆ ಎನ್ನುವ ನಂಬಿಕೆಯಿದೆ. ಶಿವನು ಕಲೆ, ಕರಕುಶಲ ಮತ್ತು ವಿಜ್ಞಾನದ ಮೂಲವಾಗಿದ್ದಾನೆ. ಇದಲ್ಲದೇ ಶಿವನು ಉತ್ತಮ ಸಂಗೀತಗಾರ, ನರ್ತಕ ಮತ್ತು ಗಯಕ ಕೂಡ ಆಗಿದ್ದಾನೆ. ನಿಮ್ಮ ಪ್ರತಿಭೆಯನ್ನು ವೃದ್ಧಿಸಲು, ಪ್ರಪಂಚಕ್ಕೆ ಪರಿಚಯಿಸಲು ನೀವು ಇಚ್ಛಿಸಿದರೆ ಶಿವನನ್ನು ಪ್ರಾರ್ಥಿಸಿರಿ.

✍️ ನರಸಿಂಹ ಶಾಸ್ತ್ರೀ ಪುತ್ತೂರು